Die Gees en die bruid sê: “Kom!” En elkeen wat dit hoor, moet sê: “Kom!” (Openbaring 22:17).
Van die verskillende dimensies of bestaanswyses van die Drie-enige God, bly die Heilige Gees, die Gees van Christus wat in ons woon, waarskynlik die mees geheimsinnige en onbegryplike.
Terselfdertyd is dit dié kant of werk van God waaroor ons ons die meeste kan verwonder. Waaruit ons ook die meeste troos en bemoediging kan put.
Soos die digter wat in ‘n gedig Veni Sancte Spiritus! Kom Heilige Gees! die volgende oor die Gees se geheime werk geskryf het.
jy is die Trooster wat altyd mik na ons sagter weefsels, ons verwarde en verwese helftes
daar waar ons yl en dom is – ‘n magdom messe deur ons brose vel voel steek, ons hart soos rou vlees bloei
maar óók – gelukkig – waar ons ore jeuk en oopknak, ons oë hulle opsleep uit die slaap, ons vingers een vir een ontkramp
uitreik na jou kleed waar jy, ‘n sagte wind, voortdurend téén en óm en ín ons ruis.
Kom, Gees van God, raak vandag weer aan my wonde, heel my gemoed, besweer my ongeduld – selfs haat – troos my met u liefde. Amen
Carel Anthonissen
