Walter Brueggemann, ʼn Ou-Testamentikus, herinner ons dat Lydenstyd ʼn tyd van eerlikheid is (“a season of honesty”). Dit beteken dan seker iets soos die splinter en die balk (Matt 7:3). Of die besef dat in ’n verhouding die ander persoon nie noodwendig die probleem is nie, maar jy self.
Eerlikheid in Lydenstyd is die insig om die dinge wat ander doen en wat jy oordeel, te erken as dinge waartoe jy self ook die potensiaal het. In Jesse Kellermann se boek The executor ontmoet die leser ’n jong filosoof wat aanvanklik baie positief en amper naïef-onskuldig oorkom. Iets kom egter oor sy pad en ná die eerste helfte van die boek versnel die tempo en binne ’n oogwink is hy vir twee mense se dood verantwoordelik. Dié boek laat ’n mens besef: Niemand staan buite die kring van sondaars nie.
Lydenstyd is nie ’n tyd vir blinkpoets nie, maar vir eerlikheid. Miskien maak eerlikheid ons meer vry as toeplak en voorgee. Die nagmaal is tog vir dié wat in hulle eerlikheid na Christus se vryspraak verlang.
Lisel Joubert
