Boodskap vir Vandag

Search
Close this search box.
Search

In ontmoeting met Hom

Daarna het Jesus weer aan sy dissipels verskyn,
by die see van Tiberias (Johannes 21:1).

Christus is in julle, Hy is julle hoop op die heerlikheid (Kolossense 1:27).

Terwyl ons vir die geloof in Jesus se opstanding aangewys is op die sogenaamde Skrifte, die mondelinge en skriftelike getuienisse van die eerste apostels en dissipels, is daar iets belangriks wat bykom.

Dit is die ontmoeting met Jesus self.

Hieroor rapporteer die opstandingsverhale ook heel kwistig. Hoe Jesus ná sy opstanding aan sekere mense verskyn het – hulle gaan opsoek en ingelei het in, ja, selfs teruggelei het na die geloof. Dit is trouens waarheen die verhale en getuienisse oor Jesus se opstanding ons uiteindelik wil neem; dít is wat die geloof uiteindelik opwek en aan die gang hou.

Naamlik dat ons soos die Emmausgangers en vele ander soos Thomas, Petrus, Jakobus en Paulus die lewende Here self sal ontmoet, in blywende gemeenskap met Hom sal leer leef, ja, letterlik in Hom sal bly soos wat Hy self in Johannes 15 versoek het.

Dit is nie om dowe neute nie dat Jesus met sy hemelvaart beloof het dat Hy by ons sal wees tot aan die einde van die dae nie (Matt 28:20). Sy fisiese vertrek, só beloof Hy in Johannes 16:7, maak dit juis moontlik dat Hy ná sy opstanding op ‘n meer intieme manier by ons kan wees, naamlik deur sy woord, en veral deur sy Gees wat in ons woon en werk.

Ook in die sakramente. En natuurlik in die gestalte en nood van die vreemdeling en die arme wat ons daagliks tegemoet tree.

Sodat ons op hierdie aarde nie soos weeskinders hoef te voel nie, maar Hom met groter blydskap kan volg en dien.

Die lewe saam met die opgestane Heer, ja, ín Hom, bly ‘n groot, onpeilbare, maar bevrydende misterie.

Waarskynlik is daar geen groter misterie as dit nie – dat ons lewe, soos Paulus dit stel, saam met die lewende Christus “verborge is in God” (Kol 3:3)!

Dankie, Here, dat U in ons leef en dat ons lewe in U veilig is by God. Amen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.