Boodskap vir Vandag

Search
Close this search box.
Search

Oortuig voor God

Elkeen moet net in sy eie gemoed oortuig wees van sy opvatting (Rom 14:5).

In Romeine 14 – waar Paulus probeer om die dreigende spanning tussen die sogenaamde vry en swak gelowiges te besweer – is daar nog ʼn perspektief of riglyn wat belangrik is.

Dit is dat ons in die hantering van sensitiewe kwessies sal seker maak ons is in ons eie gemoed oortuig van ons opvattings en keuses (Rom 14:5). Dit beteken ons is volkome helder en rustig daaroor dat ons besluite of optrede die regte besluite of optrede is.

Om die erns van die saak duidelik te maak, neem Paulus dié gedagte selfs verder. Hy beklemtoon dat gelowiges moet seker maak hulle oortuiging is ʼn saak tussen hulle en God (Rom 14:22).

Elders in hierdie gedeelte skryf Paulus dat elkeen oor hom- of haarself voor God rekenskap sal moet gee (Rom 14:12). Dit gaan dus nie in die eerste plek oor wat mense sê of dink, oor watter faksie jy moet navolg of oor wie se kant jy in die konflik kies nie.

Nee, so maklik is dit nie. Veral waar dit om sensitiewe en netelige kwessies gaan, word meer van ons gevra. Daar moet ons heel eerste, en verkieslik in afsondering, ons persoonlike motiewe en sentimente eerlik ondersoek. Só maak ons seker ons besluite dien die groter saak van God se koninkryk, en nie ons eie en dikwels bekrompe sienings en sentimente nie.

Saam daarmee mag ons nooit nalaat om onsself goed in te lig oor die betrokke kwessies wat spanning en konflik veroorsaak nie.

Uiteindelik moet ons, soos Paulus elders versoek (Fil 4:6), die hele aangeleentheid of strydpunt met gebed en smeking voor God bring.

Totdat ons in ons gemoed en ons gewete oortuig is ons het reg besluit.

O Here, U ken ons hart. Gee tog vandag weer deur u Gees helderheid oor netelige kwessies en skep ʼn vaste oortuiging oor besluite wat ons moet neem. Amen.

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.