Boodskap vir Vandag

Search
Close this search box.
Search

ʼn Nuwe gonswoord

Stuur u lig en u waarheid dat dié my lei (Ps 43:3).

Onlangs het ek die voorreg gehad om deel te neem aan ʼn interessante konferensie oor “Om eg teenwoordig te wees”.

Dié tema gons op die oomblik in sekulêre maar ook godsdienstige kringe.

Oral in boekwinkels duik literatuur hieroor op. Wie ken nie The Power of Now van Eckardt Tolle nie? Dit is maar een van talle publikasies wat die noodsaak van egte teenwoordigheid, oftewel volle bewussyn (“mindfulness”) – soos dit in sekere kringe bekendstaan – beklemtoon.

Op my lessenaar lê twee bekende boeke hieroor – The Full Catastrophic Living van Jon Kabat-Zinn, ʼn gesaghebbende oor meditasie en hoe dit groter bewussyn of teenwoordigheid kan bevorder, en The Mindful Way through Depression, wat deur vier internasionaal bekende sielkundiges en psigiaters geskryf. Dié interessante boek word as ʼn nuwe handleiding vir emosionele gesondheid en balans aangebied.

Só kan ek aangaan. Sommige teoloë vertrou nie hierdie uitsluitlike fokus op bewussyn nie en verkies eerder die frase “om meer sielvol te leef”.

Hoe dit ook al sy, wie oor hierdie onderwerp begin lees, kom gou agter ons gejaagde kultuur en veral ons oorvol lewe het tot hierdie nuwe belangstelling aanleiding gegee. Want, só voer die meeste skrywers aan, sonder dat ons dit aldag besef, leef die meeste van ons sonder egte bewussyn.

Ons lewe word gedryf deur aansprake en eise wat ons nie net uitput en vermoei nie, maar ons ook op allerlei subtiele maniere vervlak en van ons diepste bestemming as mens vervreem – meestal met katastrofiese gevolge vir ons en die omgewing.

My opdrag by hierdie konferensie was om na te dink oor “Spiritualiteit van teenwoordig-wees” – wat dit behels en waar dit ons uitbring. In die volgende paar dae wil ek enkele gedagtes hieroor met julle as lesers deel en dit saam met julle verken.

O Here, wees by ons vandag en leer ons opnuut om met groter integriteit te leef. Ook om meer teenwoordig te wees by mense en dinge. Amen.

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.