Jesus antwoord hom: “‘Jy moet die Here jou God liefhê met jou hele hart en met jou hele siel en met jou hele verstand. Dit is die grootste en eerste gebod. En die tweede, wat hiermee gelyk staan, is: ’Jy moet jou naaste liefhê soos jouself’” (Matt 22:37-39).

Waarom skat baie mense en kenners vandag die belangrikheid om bewustelik in die hede te leef en só eg teenwoordig te wees, so hoog?

Allereers is dit belangrik omdat ons op dié manier nader aan alles in en rondom ons kan kom. Hierdie “alles” sluit natuurlik allereers ons eie gedagtes en emosies in, maar veral ook die bestaan van ander mense, die aarde en uiteindelik die godheid.

Ons sou hierdie gedagte ook anders kon stel.

Deur eg teenwoordig te wees by onsself en by ander begin ons iets aanvoel en verstaan van ons innige en noodsaaklike verbondenheid met alles in en rondom ons. Dit is die bewussyn dat ons deel is van ʼn heilige en omvattende netwerk (sacred network), soos iemand dit eenkeer genoem het, en dat ons daarsonder nie sinvol kan bestaan nie.

Dit is presies omdat die mens hierdie oerkonneksie met alles, by name die aarde, verloor het dat ons vandag ʼn ekologiese krisis beleef. Ook die gemak waarmee baie hulle toevlug tot misdaad, uitbuiting en geweld neem, wys hoe diep vervreem hulle van hulleself, van ander en van God geraak het.

Jesus se oproep dat ons God moet liefhê en ons naaste soos onsself (Matt 22:34-40) is onder meer ’n oproep om opnuut bewus te word van hierdie lewensnoodsaaklike verbintenisse of verhoudings. Dit is ʼn oproep om dit bewustelik te soek en te koester.

Sonder dié bewussyn loop ons gevaar dat alles in ons lewe en in die wêreld uitmekaar kan val.

Dus, weereens: Raak ’n oomblik stil en word met nuwe respek en bewoënheid bewus van die wonderlike, lewegewende en heilige netwerk waarvan jy vandag deel is.

Ja, raak bewus van die wonder dat jý bestaan.

Here, dankie dat ek vandag deel kan wees van die heilige netwerk wat U op so ʼn wonderlike manier bedink en daargestel het. Amen.

Carel Anthonissen