Boodskap vir Vandag

Search
Close this search box.
Search

In aanraking met die groot Misterie

Om te glo, is om seker te wees van die dinge wat ons hoop, om oortuig te wees van die dinge wat ons nie sien nie (Hebreërs 11:1).

Hoe die gordyn op die misterie van die Godheid vir haar gelig het, en hoe dit haar bevry het om met vreugde en oorgawe saam te leef met die teenstrydighede in haar eie lewe, word aangrypend deur Denise Ackermann in haar nuutste boek, “Surprised by the Man on the Borrowed Donkey”, beskryf.

Tot voor dié oomblik, so vertel sy, was sy ‘n soekende mens met ‘n intense verlange om die geheim van die Goddelike intiemer te verstaan en te beleef.

Dit was nie maklik nie. Sy moes haarself al meer na binne keer ten einde haar verlange meer direk en deegliker te ondersoek en te beproef. En toe, op ‘n dag, het die verrassende skielik gebeur. In haar woorde:

“Hoe dieper ek my innerlike verlange beproef het, hoe meer teenstrydig en paradoksaal het dinge geword. Ek het alleen geweet dat ek wou val in die ‘hande van die lewende God’ (Hebr 10:31). Ek het vermoed dat dit ‘n plek van verrassing en groot weerloosheid sou wees.

“Dit wás ook so; maar ek was oorstelp van vreugde. God het my aangeraak. In ‘n onuitspreeklike en vlugtige, maar nooit-te-vergete oomblik, het ek die Teenwoordigheid geken. My verlange was gestil en my lewe het verander. Te midde van paradoks, het ek die waarheid gesien. Die Onbekende het vir ‘n kort wyle kenbaar geword; en toe weer verdwyn.”

Hierna, so vertel sy, moes sy leer dat geloof nooit ‘n vaste en finale wete of bewys van die sogenaamde waarheid is nie. Inteendeel, sy het ontdek dat die pad van geloof ‘n eie vrag vrae en onsekerhede meebring. Wie egter hierdie vrae eerlik in die oë kyk en diep deurleef, ervaar algaande ook die gawe van groei, van nuwe insigte en verrassende vryheid.

En só, langs die weg van eerlike worsteling, het Ackermann ontdek verdiep die geloof en raak ‘n mens al nederiger en afhanklik. Soos die Hebreërskrywer, ontdek die gelowiges dat geloof sy eie sekerhede saambring, dat dit ‘n oortuiging word van dinge wat hulle nie aldag sien nie (Hebr 11:1).

Here, dankie dat U by ons is, selfs al is die pad donker, onverstaanbaar en moeilik. Help ons om hierop te bly vertrou. Amen

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.