Boodskap vir Vandag

Search
Close this search box.
Search

Liefde wat selektief is

Almal moet trouens teenoor mekaar nederig wees en mekaar help, want “God weerstaan die hoogmoediges, maar aan die nederiges gee Hy genade.” (1 Petrus 5:5)

Ons onverskilligheid teenoor ander hoef nie altyd so blatant of kru te wees nie.

Presies soos dié wat ander openlik beskinder en veroordeel en selfs – kan mens dit glo? – tot die hel verdoem.

Nee, ons gebrek aan liefde word dikwels op ander meer subtiele maniere uitgeleef of in spel gebring, meesal sonder dat ons eers daarvan bewus is hoe ons in sekere situasies steeds ander te na kom.

Soos daardie man wat in geselskap altyd hartlik op jou afstorm om te groet. En dan, sodra hy jou hand vasgegryp het, reeds verby jou kyk of daar nie iemand anders meer belangrik en interessant in die vertrek is nie.

Hierdie soort liefde of belangstelling is nie net oneindig selfgerig nie, maar is ook meesal hoogs selektief. Dit soek dié uit wat jou kan verryk en vermaak.

Ons ken dit tog: hoe almal van ons, ten minste by tye, daarvan hou om met die bekendes, die vernames en invloedrykes te meng en geassosieer te word. En hoe dit jou laat goed voel, selfs jou status, aansien en profiel as mens verhoog.

Die probleem is dat ons op dié manier – weer eens sonder dat ons dit altyd goed besef – maklik verbyleef aan hulle wat destyds veelmeer in Jesus se visier was: die eenvoudiges, die armes, die miskendes en eensames.

Weerlose mense wat ons lewe op sovele ander maniere kan verryk.

O Here, bewaar ons vandag van liefde wat selektief en selfgerig is. Bevry ons tot die grootmoedigheid en almal-insluitende liefde wat so deel was van Christus se lewe. Amen

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.