Hy het gesê: “Die tyd het aangebreek, en die koninkryk van God het naby gekom” (Markus 1:15).

Volgens Markus begin Jesus sy openbare bediening met die dramatiese aankondiging dat die koninkryk van God nou naby gekom het.

Maar wat beteken dit dat die koninkryk van God naby is, selfs ónder ons?

Allereers dat daar in die antieke en patriargale kultuur van destyds, ‘n nuwe orde, ja, ‘n nuwe vorm van lewe en bestaan aangebreek het – een wat in Jesus se lewe sigbaar geword het, in sy unieke aanslag, styl en optrede.

Anders as die benepe, magbeluste en onderdrukkende leiers of konings van destyds, het Jesus liefde en geduld, geregtigheid en vrede, gelykheid en verdraagsaamheid verkondig en uitgestraal.

Jesus se aankondiging dat met sy koms God se koninkryk aangebreek het, herinner ons daaraan dat in ‘n wêreld van onreg en terreur, van bedrog en grypsug, moord en uitbuiting, dit tog ánders kan – mensliker, vryer, oper, regverdiger, verdraagsamer, liefdevoller, hoopvoller en goddeliker.

Want Hý het dit voorgeleef. Méér nog: Hy het dit onder ons gebring en moontlik gemaak.

Selfs al vergeet of ondermyn sommige mense hierdie goeie deugde, ná Jesus se koms kan niemand kan dit meer wegneem of ongedaan maak nie.

Jy kan alleen daaruit gaan leef en só wys dat jy God se koninkryk eer.

Here, help my vandag om soos Jesus u koninkryk te dien. Amen

Carel Anthonissen