Ek wil vroeg opstaan, met harp en lier wil ek die rooidag wakker maak (Psalm 108:3).
Bekering, die bewustelike toekeer tot die orde en ritme van God se daaglikse werk in ons lewe, is nie alleen ‘n voortdurende proses nie.
Dit verg ook ‘n bepaalde dissipline en toewyding.
In dié verband bly die afskop van ons dag, die manier waarop ons dit begin, van die uiterste belang. Want ons almal weet: Voor jy jou kom kry, het die werk, en nog erger, die ritme en spoed van ons samelewing met al sy omstrede eise, kompulsies en verdagte waardes, jou meegesleur en ingesluk.
Sodat jy baie oppervlakkiger en sekulêr begin leef as wat jy self verlang of as wat by ‘n Christengelowige pas.
Die teoloog, Dietrich Bonhoeffer, het die waarde van vroeg opstaan en reg begin in die tyd van sy gevangenskap goed besef. Gepla deur die versoekings wat alleenheid kan bring, skryf hy aan sy vriend, Eberhard Bethge, dat daar niks is wat die spinnerak van ongesonde drifte so verdryf as ‘n koue stort vroeg in die môre nie.
Hierdie afskop of begin sal van persoon tot persoon verskil. Miskien sal dit ‘n oomblik van stilte wees of stap om die blok, ‘n ent met jou fiets – of eenvoudig ‘n lekker ontbyt saam met die familie of ander mense.
Jy sal wéét watter ritueel of dissipline jou kan help om jou dag reg te begin sodat jou lewe iets van Christus se gees kan adem.
Here, gee my die dissipline om my dae in u Naam te begin. Amen
Carel Anthonissen
