Hulle was verstom oor sy leer, want Hy het hulle geleer soos een wat gesag het, en nie soos die skrifgeleerdes nie (Markus 1:22).

Wanneer Jesus in ooreenstemming met Jesaja se belofte (Jes 8:23-9:1), lig in die skemerwêreld van Kapernaum begin indra, gebeur daar twee dinge.

Mense is allereers verstom oor sy leer – oor die nuutheid en varsheid daarvan. Méér nog, die gesag daarvan. Dit wil sê die krag, selfvertroue en eerlikheid waarmee Hy praat, raak hulle. Sodat hulle verbaas begin vra: “Wat gaan hier aan …?” (Mk 1:27).

Kom ons gee toe: In ‘n kultuur waar woorde leeg en beloftes goedkoop geword het, waar politici en ander leiers vanweë korrupsie, oneerlikheid en dubbelpratery hulle gesag en invloed grotendeels verloor het, sug en verlang ‘n mens baie dae na woorde soos dié van Jesus.

Woorde wat aangenaam is om na te luister, wat jou kan laat opkyk van verbasing. Woorde wat jou nie alleen diep tref nie, maar jou só kan ontroer en meevoer dat dit jou lewe verander.

By Jesus het die gesag en trefkrag van sy woord daarin geskuil dat God deur hom gepraat het.

Geen wonder nie dat selfs die Bose vir sy woorde gesidder het.

O Here, laat daar vandag weer mense, ja, leiers wees wat na vore tree en met u gesag kan praat. Amen

Carel Anthonissen