As julle geloof die toets deurstaan het, stel dit julle in staat om te volhard (Jakobus 1:3).
Een van die opvallende kenmerke van Israel se tyd in die woestyn, was hulle gedurige gekla.
Elke nou en dan het dit soos ‘n siekte uitgebreek – die ongedurigheid, die gesug, die geneul. As dit nie was oor die leierskap van Moses en Aäron nie (Num 14:1), nie, was dit oor kos en water (Num 11:4, Num 20:2-3, Num 21:4-5).
Dit is geen wonder nie dat Moses, en met name God, hartlik moeg daarvoor geraak het. Want die gekla was nie net ‘n mosie van wantroue in God se goedheid en genade waarmee God Israel uit die slawerny bevry het nie. Dit was ook ‘n teken van groot ondankbaarheid.
Terselfdertyd het die volk daarmee laat blyk hoe min hulle nog verstaan het dat swaarkry en ontbering hulle geloof kan verdiep. Hulle selfs op ‘n ironiese, maar wonderlike manier, vir ‘n nuwe toekoms kan voorberei.
Want swaarkry, so lees ons by Jakobus (Jak 1:2-8) en Petrus (1 Pet 1:3-9) kan dit doen. Dit toets die egtheid van ons geloof. Dit leer ons die geheim van geduld en volharding in moeilike omstandighede. En só word ons geestelik ryper, meer volwasse en weerbaar.
Die lydensweg van Christus wil ons natuurlik dieper dié geheim binnelei.
Here, daar is baie dinge wat ons vandag weer laat sug en kla. U ken dit. Leer ons om U daarin te ontdek en só in ons geloof te groei. Amen
Carel Anthonissen
