Boodskap vir Vandag

Search
Close this search box.
Search

Vry om te dien

Die Seun van die mens het ook nie gekom om gedien te word nie, maar om te dien en sy lewe te gee as ‘n losprys vir baie mense (Markus 10:45).

Anders as van die ander Evangelies, vertoef Markus nie té lank by Jesus se lyding aan die kruis nie, gee hy nie oormatige aandag daaraan nie.

Wat egter nie beteken dat Jesus se lyding en kruisdood vir hom sonder betekenis was nie.

Allereers wou hy daarmee Jesus se trou aan ons as mense uitbeeld. So kies Jesus byvoorbeeld sélf om hierdie sware lot op Hom te neem – terwille van ons! Méér nog: Die kruis – so beskyf Markus dit – moet uiteindelik dien as “’n losprys vir baie” (Mark 10:45).

By Markus verwys hierdie uitdrukking nie allereers na die offerkultus nie – asof Jesus se dood ‘n soenoffer vir ons sondes was – maar na die vrylating van ‘n slaaf. Dít, aldus Markus, was dan ook die bedoeling van Jesus se hele lewe, en veral van sy dood. Dit was ‘n middel waardeur mense met die oog op diens in die koninkryk van God vrygemaak is.

Ja, vrý van alle bekommernisse, bindinge, ongesonde gewoontes, kompulsies, drange en begeertes wat ons kan weerhou om dié mens te word wat ons moet wees!

Die vraag is: Gló ons dit, ja, vertrou ons hierop wanneer ons vandag weer dink aan die bloeiende Man aan die kruis?

Dat Hy ons vrý kan maak!

Dankie Here dat U gekom het om ons vry te maak. Help ons om dit te glo. Amen

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.