God het hierdie Jesus uit die dood laat opstaan; daarvan is ons almal getuies (Handelinge 2:32).

Nog iets wat ons in ‘n tyd van twyfel en skeptisisme kan oortuig van die egtheid van Jesus se opstanding, is die geweldige effek wat dié boodskap op sy volgelinge gehad het.

Ja, selfs wanneer ons diep skepties is, moet ons toegee: Iets het met hierdie mense gebeur wat nie alleen alle logiese denke oorskry nie, maar wat eenvoudig alle normale verwagtings van hoe hulle lewe verder moes verloop, totaal omver gooi.

Want waar hulle kort ná Jesus se sterwe nog angstig en verskrik vir hulle vervolgers gaan wegkruip het, staan hulle kort daarna op met nuwe selfvertroue en vrymoedigheid. En dít, so sou hulle later getuig, omdat die opgestane Heer aan hulle verskyn het.

Die Een wat met sy verskyning hulle nie alleen totaal verras het nie, maar ‘n nuwe vlam van geloof, hoop en liefde in hulle lewe ontsteek het. Ook die krag om alle weerstand en vervolging, lyding en swaarkry met ‘n ongekende soort taaiheid en selfs blydskap tegemoet te gaan.

Dit is hierdie wonder en vlam van Christus se teenwoordigheid wat vandag nog die Christendom laat voortstu, ondanks sy talle afwykings en ontsporings.

O Here, bevry ons vandag van ons angs en twyfel. Maak ons opnuut weer vrymoedige getuies vir U. Amen

Carel Anthonissen