Spoor hulle aan om goed te doen, om ryk te wees in goeie dade, vrygewig en mededeelsaam (1 Timoteus 6:18).

Verlede week nooi die bekende omroeper, Amoré Bekker, in haar geselsprogram mense uit om verhale van hoop te vertel.

Méér spesifiek gestel: Sy wil by die luisteraars hoor wat hulle tans doen of gaan doen om van ons land ‘n beter en gelukkiger plek te maak.

Dit is egter asof die luisteraars haar aanvanklik nie wil hoor of verstaan nie. Want die meerderheid wat inbel, gebruik die tyd eenvoudig om te kla en negatiewe kritiek te lewer. Dit neem haar uiteindelik ‘n goeie tien minute – en selfs ‘n bietjie ongeduld – om die luisteraars na die eintlike doel of punt van haar program terug te bring.

Dit is om te fokus op wat positief en konstruktief is.

Die episode het weer eens die donker en negatiewe stemming waarin baie van ons tans verkeer, bevestig. My ook laat dink aan die bekende Oosterse digter, Khalil Gibran, se vermaning: “If your heart is a volcano, how can you expect flowers to bloom.”

Dit is inderdaad ‘n tydige vermaning – want ons roeping bly steeds dít: om die negatiewe met die positiewe, die slegte met die goeie te oortroef.

En só die spreekwoordelike blomme te laat blom.

O Here, gee my vandag ‘n positiewe gesindheid en uitkyk op die lewe. Amen.

Carel Anthonissen