Esegiël 37:1-14 herinner ons dat niks ooit hopeloos is nie – dat die genade van God, ja, sy Gees wat nuwe lewe wek, ons op allerlei maniere onverwags kan oorrompel en verras.

Ons moet alleen volhardend en vertrouensvol daarop wag – en dit waag om elke dag daarvoor op die uitkyk te wees.

Hoe die genade nuwe lewe wek sonder dat ons noodwendig daarvoor gevra of gewerk het, is al deur baie mense ervaar. Nie die minste nie deur die digter wat in sy gedig “gevlek” vertel hoe ‘n mooi stuk musiek hom op ‘n dag as ‘n teken van hierdie genade verras en geheel het. Luister net:

in die gevulde uur het Jy
my kom vlek

met die vlymskerp mes
van jou wulpse genade

wat stroom deur ‘n enkel
viool se vuurrooi klank.

tóé het Jy gegee van die
rykdom én smart van eie
kinders,

die ligtende son wat opkom
waar bedelaars dit waag

om in jou spoor te trap.

Is jou oë en ore vandag oop genoeg om hierdie ligtende genade van God, wat onder andere deur mooi musiek in ons lewe kan inval, op te merk?

Here, u genade stroom elke dag in en om ons. Help ons deur u Gees om dit raak te sien en met blydskap te omhels. Amen

Carel Anthonissen