‘n Kalm gemoed hou die liggaam gesond (Spreuke 30:30).

Dit is nie genoeg om bloot te hoor dat jy, ter wille van ‘n beter lewe en ‘n heler aarde, ‘n pelgrim moet wees nie.

‘n Mens moet dit beslis ook wórd – die krag en moed bymekaar skraap en dit daadwerklik gaan uitleef. Nie langer blindweg en meganies sáám met die stroom van ons kultuur dryf nie, maar iewers uitklim en ánders, méér betekenisvol en dieper gaan leef.

Om ‘n pelgrim te word, in die woorde van die Hebreërskrywer, is om die toekomstige, die nuwe, dit waarna almal verlang, aktief te gaan soek en te beproef.

’n Beginpunt kan wees om eenvoudig tyd maak om weg te breek uit jou normale en dikwels sieldodende roetine. Om gereeld ‘n stil oomblik of plek vir kalmte, inkeer en nadenke te gaan soek.

Of beter nog: Om alleen of sáám met ander te gaan reis, letterlik ‘n pelgrimstog te onderneem waar jy weer perspektief op jou lewe kan kry. En selfs belangriker: Waar jy in stilte en afsondering nader aan jou Skepper kan kom. En voor jou Skepper ook náder aan die dinge óm jou en aan jou innerlike goeie self – daardie self wat liefdevoller, méér begrypend en geduldig wil wees.

Here, ons weet tog al lankal wat ons in U is. Gees van God, kom en help ons om dit ook te word. Amen

Carel Anthonissen