Boodskap vir Vandag

Search
Close this search box.
Search

Die liefdesbriewe van God

Toe het die Here vir Moses gesê: “Trek nou hiervandaan weg…” (Eksodus 33:1).

‘n Ruk gelede ontvang ek ‘n uitnodiging vir ‘n toer na Namakwaland.

Die toer is beslis anders as die gewone – dit word as ‘n pelgrimstog aangebied, ‘n geestelike reis. Een waarin jy die natuur én die goddelike nuut kan leer waardeer. Nog beter gestel: Waar jy die goddelike ín die natuur kan ontdek en beter leer ken.

Treffend stel die uitnodiging dit: “Op die toer wil ons die vriendelikheid van die natuur kombineer met die vriendelikheid van God.” ‘n Pragtige aanhaling lig dié gedagte toe: “Nature, ‘full of the love letters of God to us’ (Ernesto Cardinal) wants to tell us of God’s friendship towards us.”

Hierna sluit die uitnodiging af: “Gedurende hierdie toer van ses dae wil ons jou saamneem om te lees, te luister en om God se liefdesbriewe aan jou in die alleenheid, stilte, eenvoud en stadige tempo van die reis te verneem. God se liefde wat sigbaar is in die ongelooflike helderte van sterre in die aand, die kleur en geure van blomme, insekte en voëls. Asook die groot verskeidenheid van berge en oop vlaktes.”

Dié reis is nie denkbeeldig nie. Dit bestaan. Dit kom in Augustus en September. Dit pas boonop in by ons huidige nadenke oor die wonder van God se skepping en ons verantwoordelikheid daarin.

As jy ses dae lank op dié manier ‘n pelgrim wil word – skryf net ’n e-pos terug vir nog besonderhede.

Here, dankie dat U ons deur die wonder van u skepping ontmoet en wil bevriend. Maak ons vandag oop en bereid daarvoor. Amen

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.