Here, onse Here, hoe wonderbaar is u Naam oor die hele aarde! (Psalm 8:10).

Om die Stellenbosse Universiteitskoor te hoor, bly ‘n oorweldigende ervaring.

Geen wonder nie hulle het reeds twee keer die gesogte prys as voorste koor in die wêreld verower.

Onder leiding van hulle uitsonderlik bekwame en kreatiewe dirigent, maak hulle musiek en sing liedere wat diep raak en ontroer. Ook mense inspireer om ‘n verskil aan ons gebroke wêreld en verdeelde samelewing te maak.

Een van die mooi liedere wat hulle sing, heet dan ook “We can mend the sky”.

Gekomponeer deur die Amerikaner, Jake Runestadt, is die lied gebaseer op ‘n gedig van ‘n veertienjarige Somaliese vlugteling, Warda Mohamed.

Sy druk haar droom só uit:

“In my dream I saw a world free of violence, hunger, suffering. A world with love. Let’s go – to save your soul, run with all your might. If we come together, we can mend a crack in the sky.”

Hoor jy dit? Die geloof van ‘n relatief onskuldige kind dat ons sáám die spreekwoordelike kraak wat vandag deur soveel dinge loop, kan heel.

Haar woorde beskaam en gryp tegelyk aan.

Here, dankie vir musiek wat ons inspireer om ‘n verskil aan ons gebroke wêreld te gaan maak. Sodat mense kan sien hoe wonderbaar u naam oor die ganse aarde is. Amen

Carel Anthonissen