Deur baie sulke gelykenisse het Jesus met die mense oor sy boodskap gepraat … (Markus 4:33).

Die week se tekste dek ‘n paar van Jesus se gelykenisse oor God se koninkryk.

Die gelykenisse is om verskeie redes boeiend en vertroostend.

Vir eers herinner hulle ons aan die belangrike plek van stories in ons lewe. Aan die feit dat ons lewe niks anders as ‘n kleurryke reeks verhale is nie. Wie hulle begin vertel, begin nie net insig in die ryk weefsel van hulle eie geskiedenis kry nie, maar daardeur ook iets van hulle eie harte aan ander weggee.

Jesus se stories, soos in die gelykenisse uitgedruk, neem ons egter nog ‘n stappie verder. Dit herinner ons dat die lewe vol misterie en wonder is. Wie dieper kyk en skerper luister, kan in die mees alledaagse gebeure en dinge van die lewe die fluisteringe van God hoor.

Daar kan ons hoor hoe verlore goedere ‘n herinnering aan God se drang na mense afspieël (Luk 15). Hoe olie wat lampe laat brand, ons herinner aan die noodsaak van verwagting en waaksaamheid (Matt 25:1-13). Hoe die groeikrag van klein en onbenullige saad ‘n venster op God se unieke manier van werk in ons lewe open (Mark 4:26-34).

En só, deur Jesus se stories, kom ons nader aan die geheime van ons eie lewe.

En natuurlik aan die Bron van alles.

Here ons God, dankie vir die stories wat U vir ons deur Jesus se getuienis nagelaat het, en waaruit ons vandag weer troos en versterking kan put. Amen

Carel Anthonissen