Boodskap vir Vandag

Search
Close this search box.
Search

Om te midde van storms steeds te glo.

Hy sê vir hulle: “Waarom is julle bang, kleingelowiges?” Daarna het Hy opgestaan en die wind en die see hard aangespreek, en dit het doodstil geword (Matteus 8:26).

Nou saam met Jesus se vraag in Markus 4:40 oor waarom sy dissipels bang is, loop ‘n volgende vraag: “Het julle dan nie geloof nie?”

Met dié vraag staan ons by die hart van die verhaal.

Want dít is waarom dit in die storie gaan: dat Jesus se dissipels – en natuurlik ons ook – te midde van die storms, die terugslae en verskrikkinge van die lewe, nie moed of geloof sal verloor nie.

In Matteus se weergawe van dieselfde storie, is dit dan ook die fokus. Anders as Markus waar Jesus éérs die storm stilmaak en dán die vraag na hulle geloof opper, laat Matteus die vraag na geloof opklink, terwýl die storm aan die gang is (Matt 8:26).

En dít is die punt: dat ons as volgelinge van Jesus moet leer om te midde van die storms, terwyl die winde tier en die golwe raas, ja, terwyl die angs styg, sal bly vertrou dat die God van Jesus in beheer is en ons nooit sal begewe of verlaat nie.

En ons mág maar hierop vertrou. Want dieselfde storie vertel hoe Jesus, amper as ‘n soort demonstrasie van sy mag, kort daarna die storm tot bedaring gebring het (Matt 8:26).

O Here, ons geloof is só klein. Gee ons vandag méér en groter geloof. Amen

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.