Ek sal vir hom ‘n vader wees en hy sal vir My ‘n seun wees. As hy ontrou is, sal ek mense gebruik om hom te straf, hom te kasty. Maar my trou sal ek nie aan hom onttrek nie (2 Samuel 7:14-15).

Dat God se weë hoër is as ons s’n is en sy planne boonop beter, is duidelik te sien in God se woorde via sy profeet Nathan aan Dawid in 2 Samuel 7.

Hier sien ons hoedat God se woorde, ten spyte van Dawid se impulsiewe en kortsigtige planne, vol nuwe beloftes en veral seën is.

So begin God se woorde met die wonderlike herinnering dat Dawid reeds vroeg as ‘n eenvoudige herder by sy skape gekies, gelei en beskerm is, en dat hy ook afgesonder is om as koning God se volk te lei.

Op hierdie pad, so lui God se beloftes verder, sou God gedurig by hom wees – hom van gevare bewaar en selfs van sy sogenaamde vyande rus gee. Kortliks (en dit vorm die hart van hierdie reeks beloftes): God sou vir hom ‘n sorgende Vader wees. Een wat via die optrede en vermanings van ander ook kon straf, maar wat in sy trou Dawid nooit sou verlaat of prysgee nie.

Dit is geen wonder nie dat Dawid by die aanhoor van hierdie beloftes alleen in verwondering kon uitroep: “Here my God, U het gepraat en omdat U seën, is die koningshuis van u dienaar vir altyd geseën” (2 Sam 7:29).

Weliswaar leef ons in ander tye as Dawid. Tog, wie vandag in opregte nederigheid buig, mag ook soortgelyke woorde van seën vir hulleself toe-eien.

Dankie, Here, dat U ons bly dra en seën, selfs al verdien ons dit nie. Amen

Carel Anthonissen