Noudat ek van Epafroditos ontvang het wat julle gestuur het, het ek alles wat ek nodig het (Filippense 4:18).

Praat van dinge wat sin kan gee aan ons lewe!

Tydens die sogenaamde “Reign of Terror” in Rusland in die dertigerjare van die vorige eeu, word Natalya Rykova onskuldig veroordeel. Sy beland vyftien jaar lank in ‘n strafkamp. Haar invloedryke man, Alexei Rykov, is enkele dae vroeër deur Stalin en sy trawante koelbloedig vermoor.

Maar dít was hoe Stalin se Bolsjewiste in dié dae regeer het – deur ou partygenote en vriende as sogenaamde bedrieërs op te stel, hulle valslik aan te kla en dan wreedaardig uit te skakel.

Natalya Rykov oorleef wel dié nagmerrie. Sy keer later terug Moskou toe om as 85-jarige haar verhaal te vertel – weliswaar sonder bitterheid, maar met trane wat oor haar wange stroom.

“I survived because of the beauty of nature that I saw every day in the forests and the kindness of people, for there were more kind people than bad people.”

Wie goed kyk en daarvoor oop is, sal vandag steeds ontdek dat hierdie twee dinge – die skone natuur en die deernis van goedhartige mense – sin aan ons lewe kan gee.

Veral wanneer ons onsself in die spreekwoordelike wildernis bevind.

Here, dankie vir die seisoene, vir die skone natuur en veral vir goeie mense, ja, liefdevolle vriende én vreemdelinge wat vandag weer sin aan ons brose lewe verleen. Amen

Carel Anthonissen