My broers, julle wat glo in ons Here Jesus Christus, die Here van die heerlikheid, moet mense nie volgens hulle uiterlike beoordeel nie (Jakobus 2:1).
‘n Kwaal of sonde wat die mensdom oor eeu reeds pla en waarvan ons skynbaar moeilik ontslae raak, is die kwaal van onregverdige diskriminasie.
Dit is dat jy mense op hulle uiterlike beoordeel, volgens hulle voorkoms, status, ras, kleur of stand. En dan op grond dáárvan sommige doelbewus uitsluit, ignoreer en selfs minag.
Terwyl jy ander mense – gewoonlik van jou eie soort of groep – skaamteloos voortrek, ophemel en bevoordeel.
Volgens die brief van Jakobus lê hierdie kwaal van onregverdige diskriminasie aan die wortel van al die naywer, twis en verdeeldheid wat so dikwels tussen mense ontstaan.
Die ergste – en daaroor handel Jakobus 2:1-17, ons teks vir die week– is dat hierdie kwaal oor die eeue heen ook die lewe van die Christelike gemeente binnegedring en beduiwel het. Trouens, tot vandag toe nog is daar mense wat om dié rede nie in die kerk van Christus tuis voel nie.
Dit mag tog nie! Want behalwe dat gelowiges ‘n God aanbid wat mense nie volgens hulle uiterlike beoordeel nie (Efes 6:9; Kol 3:25; 1 Petrus 1:17), bly die kerk geroep om in dié opsig ‘n andersoortige gemeenskap te wees (Kol 3:9-17).
Een waarin mense mekaar in liefde sal aanvaar en waar almal – ryk en arm, lelik en mooi, klein en groot, swart of wit – volkome tuis en vry sal voel.
Ons bid vandag vir almal wat ly onder onregverdige diskriminasie. Here, bewaar ons wat voorgee dat ons U ken, van hierdie aaklige sonde. Amen
Carel Anthonissen
