Maar Ek sê vir julle: Elkeen wat vir sy broer kwaad is, is al strafbaar voor die regbank (Matteus 5:22).
Om te leef met rasse- of klassevooroordele en die haatspraak wat gewoonlik daaruit voortvloei, is geen grap of onskuldige speletjie nie.
Dit kan uiteindelik daartoe lei dat jy ander mense nie net uit jou lewe weg wens nie. Jy begin ook daarna voel om hulle fisies te benadeel of leed aan te doen. Selfs in die uiterste gevalle uit jou gesigsveld te verwyder.
Die geskiedenis is vol van sulke voorbeelde. En dit bly altyd tragies, bitter en onverskoonbaar.
Hóé tragies en bitter sien ons duidelik in Leonard Bernstein se musiekblyspel, West Side Story. Dié storie wys hoe die vete tussen twee jeugbendes in New York, gevoed deur jare lange haat en vooroordele, eindig in die dood van hulle leiers. Selfs nog erger: Die moord op Tony, die mooie Maria se onskuldige Amerikaanse beminde.
Verslae en ontnugter praat sy aan die einde die skuldiges aan: “You all killed him, and my brother, and Riff. Not with bullets and guns, but with your hate. And I can kill too, because now I have hate.”
Ja, so ‘n dodelik en vernietigend kan die kringloop word wat deur rassehaat en rassevooroordeel aan die gang gesit is.
Hierteen moet ons waaragtig in ons tyd waak.
Here, vergewe ons die afkerigheid en verborge haat wat dikwels in ons harte sluimer. Maak van ons stryders vir liefde. Amen
Carel Anthonissen
