Boodskap vir Vandag

Search
Close this search box.
Search

Die wysheid wat van Bo kom

Is daar ‘n wyse en verstandige mens onder julle? Dan moet hy dit toon deur sy goeie gedrag en deur dade wat van nederigheid en wysheid getuig (Jakobus 3:13).

Teenoor die valse wysheid, stel die apostel Jakobus in hoofstuk 3:13-18 van sy brief gelukkig ook die ware of egte wysheid.

En hoor ons tussen die reëls sy verlange dat hierdie wysheid uiteindelik die styl en getuienis van die erg verdeelde gemeente aan wie hy skryf, sal bepaal.

Hierdie egte wysheid kom uit ‘n vorm van nederigheid voort, vanuit die wete dat jou beste insigte en kennis beperk en voorlopig is. En dat jy vir goeie oordeel en keuses ook op die raad en bystand van ander aangewese is, selfs die eenvoudigstes en armstes.

Om dié rede vind egte wysheid – die wysheid wat van God kom – altyd in liefdevolle en sensitiewe gedrag uitdrukking. Jakobus spel dit uit: Die wysheid wat van bo kom, is sonder bybedoelings, vredeliewend, inskiklik, bedagsaam, vol medelye, onpartydig en opreg (Jak 3:17).

Kortliks: Wie waarlik wys is, weet hóé om hulle eie selfbehepte opinies op te skort, goed te luister en hulle in die omstandighede van ander in te leef.

En hiervoor hoef ‘n mens nie uitermate slim te wees nie – net iemand wat opreg en beskeie voor sy Skepper leef.

Here, leer ons vandag om beskeie en opreg voor U as ons Skepper en Heer te leef. Sodat ons altyd met egte wysheid en insig sal optree.

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.