Boodskap vir Vandag

Search
Close this search box.
Search

‘n Bodem waarin alles floreer

Op U, Here my God aan wie ek behoort, is my oë gerig … (Psalm 140:8)

In sy soeke om die verlore betekenis van ou Christelike woorde te herwin, skryf die Bybelkundige, Markus Borg, in sy boek “Speaking Christian” interessant oor die begrip God.

Vir hom – en hier sluit hy aan by die Joods-Christelike tradisie – wys die begrip God allereers heen na ‘n realiteit wat deur geen woord, taal of begrip beskryf of vasgevang kan word nie. Vandaar dan ook die verbod by Israel om beelde van God te maak, of selfs net God se heilige naam te noem.

Vir Israel was God geensins ‘n speelmaat nie.

Tog beteken dit nie vir Borg dat God hiermee tot ‘n onpersoonlike krag of entiteit verlaag word nie. In aansluiting by die Bybelse visie op God, laat Borg ruimte daarvoor dat God as ‘n persoonlike God gesien en veral aanbid kan word. Vir hom is God die reële en liefdevolle teenwoordigheid van die gans Andere.

As sodanig is God dan ook die Immerteenwoordige wat alles en almal deurdring, dra en beskerm. God in alles en in almal.

Of soos Willem Nicol dit eenmaal gestel het: “God is die vriendelike bodem waarin alles bestaan en floreer.”

Hierdie God, so glo ons, praat steeds vandag met ons.

Here, U is die Heilige voor wie ons vandag in eerbied buig. Maar U is ook ons Vader by wie ons vandag weer kan skuil. Amen

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.