Boodskap vir Vandag

Search
Close this search box.
Search

‘n Koninkryk sonder terreur

“My koninkryk is nie van hierdie wêreld nie,” antwoord Jesus. “As my koninkryk van hierdie wêreld was, sou my onderdane geveg het sodat Ek nie aan die Jode uitgelewer sou word nie. Maar nou is my koninkryk nie van hier nie” (Johannes 18:36).

As ek Johannes 18:35 lees, wonder ek altyd of Pilatus Jesus se antwoord op sy ongeërgde vraag goed gehoor het?

En hoor óns dit steeds vandag?

Dat Jesus se koninkryk nie van hierdie wêreld is nie. Wat beteken dat dit ‘n koninkryk sonder enige militêre begroting of wapens is. ‘n Koninkryk sonder onderdrukkende wette of terreur. Sonder vergelding of wraak.

Ja, dit is ‘n koninkryk sonder rassisme of uitbuiting, sonder die misbruik van mag of van daardie voorregte en middele wat God elke dag aan ons skenk.

Méér positief gestel: Dit is ‘n koninkryk van oorvloedige lewe. Een van ongekende moontlikhede. ‘n Koninkryk waar mense mekaar vergewe, help en bystaan, sodat vrede en geregtigheid kan begin deurbreek.

Kortliks: Dit is ‘n koninkryk waar die Gees van Christus vaardig is — dit is die Gees van liefde wat daarop afgestem is om mense bymekaar te bring.

Klink dit té idealisties?

Nee, dit is so werklik en so haalbaar as wat maar kan kom! Mits ons vandag weer bereid is om in hierdie koninkryk te glo en daaraan mee te doen.

Here, dankie dat u koninkryk van liefde en vrede reeds onder ons is. Help ons om vandag opnuut daaruit en daarvoor te leef.

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.