Boodskap vir Vandag

Search
Close this search box.
Search

‘n Nuwe somer wat aanbreek

Sodra julle sien dat hulle begin uitloop, weet julle vanself dat die somer al naby is (Lukas 21:30).

Met die eerste oogopslag mag Lukas 21:25-36 – ons teks vir die week wat oploop na die eerste Sondag van Advent – ons ietwat teen die bors stuit.

Want Advent is tog ‘n tyd van nuwe hoop en verwagting, een waarin ‘n mens jouself tereg gereed mag maak om bly en getroos te wees.

En nou praat Jesus van sware tye wat om die draai wag (Luk 21:23). Van radeloosheid onder die volke (Luk 21:25), van spanning en vrees oor dinge wat rondom die wêreld gebeur (Luk 21:26). En van ‘n grootskaalse afstomping waar mense hulleself oorgee aan plesier en nie meer vir ander omgee nie (Luk 21:34).

Klink dit nie ontsettend bekend en naby nie?

En tog – en dít moet ons in hierdie adventstyd ook weer leer raaksien – is traumatiese gebeure soos hierdie dikwels die tekens van nuwe oorgange, van dramatiese, maar noodsaaklike veranderings. Ja, van ‘n nuwe somer wat aanbreek (Luk 21:30), van God se koninkryk wat naby gekom het (Luk 21:31).

En van God se mag en werk wat nog in óns tyd sigbaar kan word (Luk 21:32).

Dit is geen wonder dat Jesus sy dissipels – en vir ons – in sulke tye oproep om oplettend en waaksaam te leef nie (Luk 21:29,36).

En om nooit op te hou bid nie.

O Here, hoe goed om vandag weer te hoor dat ontstellende gebeure tekens daarvan kan wees dat U werk. Laat ons vandag opnuut daarop let. Amen.

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.