Maar ons wat van die dag is, moet nugter wees … (1 Tessalonisense 5:8).

Behalwe dat die liefde begin kwyn wanneer ‘n samelewing uitrafel en almal vir hulleself begin leef, is daar ook ‘n ander verskynsel wat in sulke tye maklik inskop.

Mense ontvlug in die oppervlakkige plesier van die dag — hulle bestry die angs en vul die leegte in hulle gemoed met oppervlakkige surrogate. Dit is goedkoop vervangingsmiddels.

Ook hierna verwys Lukas wanneer hy die vervlakking beskryf wat inskop wanneer ‘n samelewing begin uitrafel. Dan, so skryf, raak die mens se gees maklik in ‘n oormatige etery en drinkery verstrik. Word dit verder afgestomp deur al die sorge en bekommernisse wat knaag (Luk 21:34).

En wat jy sukkel om af te skud.

Lukas praat van ‘n vangnet wat ons op dié manier kan oorval (Luk 21:34). Terwyl die skrywer van Tessalonisense praat van ‘n aaklige nag of duisternis waarin mense só beland (1 Tess 5:7).

Die uitdaging in sulke tye bly steeds om ons geloof in God se goedheid en almag te behou. Ook om met die hoop op beter dinge te bly leef. En daarom nugter en met goeie oordeel te bly optree.

Ja, as mense van die dag wat wakker loop en helder sien.

Here, vergewe ons dat wanneer dinge swaar gaan ons moed verloor – ook kla en oppervlakkige keuses begin maak. Help ons om nugter te bly, ja, om opregte kinders van die lig te wees. Amen

Carel Anthonissen