Boodskap vir Vandag

Search
Close this search box.
Search

‘n Waarheid om van te leef

Die Gees van die Here is op My omdat Hy My gesalf het om die evangelie aan armes te verkondig (Lukas 4:18).

Elke geslag of gemeenskap, so leer die geskiedenis ons, soek en kies een of ander waarheid – party geleerdes noem dit selfs ‘n soort mite of verhaal – om van te leef.

Hierdie waarheid of verhaal moet die pad vorentoe kan wys, mense ook voortdurend kan troos en bemoedig. Daarom word hierdie waarheid dikwels fyn en goed gekies. Sodat dit die betrokkenes se beste belange kan dien, hulle eie veiligheid, gerief en voordeel tot die maksimum kan bevorder.

Dikwels ten koste en sonder in agneming van die ander – met name dié wat langs die pad uitgesak het.

Ons teks vir die week bevat ook só ‘n groot waarheid. Hierdie waarheid is vervat in Jesus se uitspraak in Lukas 4, naamlik dat Hy gesalf is om goeie nuus aan die armes te bring, om te sorg vir hulle wat sukkel en wat na die onderkant van ons samelewing geskuif is.

Ek is seker dat ons almal vandag die belang van hierdie waarheid besef. Ook weet dat wie dit ernstig neem om, soos Jesus, vir die armes te sorg, hulle lewe en geluk kan verskans teen baie toekomstige spanning en moeite.

Maar wie sal dit waag om vandag uit hierdie waarheid te leef? Om Jesus op hierdie ongemaklike pad te begin volg?

O Here, U roep ons vandag om, soos U, vir die armes te sorg. Leer ons weer om hierdie pad met geloof, durf en oorgawe te loop. Amen

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.