Boodskap vir Vandag

Search
Close this search box.
Search

My naam is my eer

‘n Goeie naam is meer werd as groot rykdom, die goeie gesindheid van ander meer as silwer en goud (Spreuke 22:1).

Die bekende rockster en musikant, David Bowie, is verlede week oorlede.

Opvallend was die wêreldwye waardering wat onmiddellik vir sy bydrae tot musiek opgeklink het. Veral sy kleurryke karakter, oorspronklikheid en voortdurende poging tot vernuwing het mense beïndruk.

Self het ek nooit baie aandag aan Bowie se musiek gegee nie, ondanks een van my goed ingeligte vriende se opmerking dat Bowie inderdaad ‘n “grote” in die musiekwêreld was.

‘n Vraag wat wel nou ná sy dood by my opgekom het, is die belangrike vraag oor watter beeld en erfenis onsself eendag gaan nalaat. Ja, hoe gaan mense ons onthou, oor ons praat, ons takseer wanneer ons ook eendag die aarde moet verlaat? Wat gaan ons naam alles by hulle oproep?

Gaan hulle ons onthou vir ons onversetlikheid, knorrigheid, slegte humeur, gierigheid of grootpratery? Of eerder vir ons geduld, nederigheid, omgee, deernis en vermoë om te luister?

Dit is belangrike vrae dié!

Tereg sing Randall Wicomb, plaaslike sanger wat ons ook onlangs ontval het: “Jy kan maar huil oor my naam, jy kan maar huil. My naam is my eer, my eer is my karakter.”

O Here, dankie vir die kosbare geskenk van ‘n goeie naam. En waar ons ons naam weggegooi en in oneer laat verval het, leer ons dat dit nooit te laat is om dit te herstel nie. Amen

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.