En daar was baie melaatses in Israel in die tyd van die profeet Elisa. En tog is nie een van hulle genees nie, maar wel Naäman, die Siriër (Lukas 4:27).
So wat was dit wat sy eie mense so kwaad gemaak het vir Jesus dat hulle Hom, volgens Lukas 4:28-29, op ‘n gewelddadige manier wou doodmaak?
En hoe help dié episode ons om hierdie Man van Nasaret met beter insig en meer geloof te volg?
Vereers het Jesus met sy woorde die mense se verwagtinge van hom as ‘n seun uit hulle buurt, nie alleen getemper nie, maar ook as vals en oordrewe ontmasker. Want soos Hy vir die mense van Kapernaum gedoen het, wou hulle Hom nou ook tot allerlei opspraakwekkende wonders en dade beweeg. Sodat hulle met trots kon sê: “Hy is een van ons! Ons het hom sien grootword!”
En dít wou Jesus nie . Sy bedoeling was nooit om mense se ydelheid, trots en hoogmoed op dié manier te voed nie.
Nee, Jesus was ‘n vreemde en nederige Messias. Een wat allereers gekom het om genesing en redding vir álle mense, met name hulle wat na die rand van die samelewing gestoot is, te bring.
En dat Jesus, net soos die ware profete van vroeër (Luk 4:25-27), hierdie weg gekies het, was nie alleen vir die Jode onaanvaarbaar nie, maar ook aanstootlik en verwerplik.
Wat ons ook weer vandag voor die vraag te staan bring: “Watter soort Jesus volg jy?”
O Here, gee ons vandag weer die moed én die vertroue om U op u weg na die randfigure van ons samelewing te volg. Hoe anders kan ons U in opregtheid dien, Here? Amen
Carel Anthonissen
