Boodskap vir Vandag

Search
Close this search box.
Search

Niks meer as ‘n ontaarde geslag nie

Toe antwoord Jesus: “Ongelowige en ontaarde geslag! Hoe lank moet Ek nog by julle wees en julle verdra? (Lukas 9:41).

Dit bly ontstellend om te sien en te hoor hoe sogenaamde beskaafde mense deesdae in ons land teenoor mekaar optree en tekere gaan.

Hoe hulle mekaar byna op ‘n roekelose manier beskuldig, uitkryt, beledig en verwyt.

Wat weer wys hoeveel onverwerkte pyn, onderdrukte woede en blinde vooroordeel nog in baie van ons leef. En hoe dun die laag van beskawing blyk te wees wanneer hierdie emosies toegelaat word om vrylik en onbeheersd uit te bars.

Gewoonlik sit so ‘n vloed van kwade en irrasionele gevoelens ook ‘n siklus van wedersydse blaam aan die gang, wat onophoudelik teer op ongesonde, indien nie sieklike vorms van trots, selfhandhawing en eiegeregtigheid nie.

Het ons werklik die evangeliese waarhede wat ons hiervan moet red, vergeet? Het ons vergeet dat ‘n mens eers goed moet luister vóórdat jy oordeel? Of dat om eie foute te erken, nooit ‘n verlies of skande beteken nie, maar ‘n waarmerk van grootsheid is – ‘n grootsheid wat altyd nuwe weë tot vergifnis en versoening oopmaak. Het ons vergeet dat die slegte wat jy in ander vind, meesal net ‘n projeksie van eie onbewuste en onverwerkte komplekse, vrese en frustrasies is?

En dat ‘n mens dít ook eerlik in die oog moet hou vóór jy begin praat of optree.

So nie sal die klag van Jesus ook van óns geld – dat ons wat bely dat ons Christen-gelowiges is, eintlik niks meer as ‘n ongelowige en ontaarde geslag is nie.

O Here, vergewe ons opnuut ons tweeslagtigheid – dat ons U as Heer bely, en dan leef asof U nie bestaan nie. Help ons om te leef van u woorde. Amen

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.