Boodskap vir Vandag

Search
Close this search box.
Search

Om vorentoe te leef

Kyk, Ek gaan iets nuuts doen, dit staan op die punt om te gebeur, julle kan dit al sien kom (Jesaja 43:19).

As daar ooit iets is wat vandag vir die inwoners van ons land dringend noodsaaklik geword het, is dit om met hoop vorentoe te leef.

Daar is net té veel mense wat steeds vasgeval sit in ‘n ongesonde nostalgie, skuld of woede oor die verlede. Of wat toelaat dat die chaos en onsekerheid van die hede hulle bly oorweldig.

Natuurlik mag ‘n mens nooit die aard of omvang van jou probleme onderskat of miskyk nie. Of toelaat dat Gods water roekeloos oor Gods akker loop nie. Maar vir gelowiges wat die beloftes van Jesaja 43 ernstig opneem, behoort één ding vanselfsprekend te wees: Daar is altyd hoop. En dat ons altyd met nuwe verwagting vorentoe kan kyk en leef.

Hoor ons dan nie in Jesaja 43:19 hoe God uit wanorde en verwarring nuwe dinge kan skep nie? En dat wie goed kyk, dit reeds kan sien gebeur nie. Hoe God ‘n pad in die woestyn kan maak (Jes 19). En hoe dieselfde magtige waters wat vroeër dreigend en vernietigend was (Jes 43:2,16-17), riviere kan word wat lewe aan dorstige mense en diere gee (Jes 43:20).

En hoe mense wat dit raaksien, God weer vir sy genadige dade sal prys (Jes 43:20).

Juis die wete dat God die geskiedenis, ja, ook mý verlede en mý toekoms gedurig in sy hande hou, moet ons motiveer om vandag met selfvertroue op te staan en te sê: “Basta met korrupsie! Basta met rassisme! Basta met geweld! Basta met swartgalligheid en gekla!”

“Ek wil saam met God ‘n nuwe toekoms help bou, net daar waar ek is.”

Here, vergewe dat ons vasval in ons eie swartgalligheid en nie raaksien hoe U reeds in en deur die wanorde nuwe moontlikhede skep nie. Maak ons vandag opnuut bewus van die nuwe wat U besig is om te bring. Amen

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.