Hou Hom voor oë wat so ‘n vyandige optrede van die sondaars teen Hom verdra het. Dan sal julle nie geestelik moeg word en uitsak nie (Hebreërs 12:3).

Onlangs sien ek ‘n boeiende televisieprogram van die bekende natuurliefhebber en filmmaker, David Attenborough.

Dit handel oor die avontuur, maar ook die probleme, wat filmmakers ervaar in hulle pogings om wilde diere en veral hulle jaggewoontes af te neem.

In die program word onder andere gewys hoe van die filmmakers letterlik weke moes wag om daardie één regte en opwindende skoot te kry. Vir sommige was die wagtyd net té lank, met die gevolg dat hulle later hulle toerusting opgepak en vertrek het.

Volgens Attenborough bestaan die geheim vir suksesvolle fotografie in die wildernis uit twee belangrike dinge. Dit is geduld en deursettingsvermoë. Daarsonder kan jy by voorbaat reeds dié onderneming prysgee.

Die film het duidelike parallelle met die lewe, veral ook die Christelike lewe. Want is dit nie ook die twee gawes wat ons in tye van geestelike droogte en twyfel benodig nie? Daardie tye wanneer ons moeg is en die sogenaamde wag- en waaktyd net té lank geword het nie?

Die troos is dat daar baie gelowiges is wat ons op hierdie pad vooruit gegaan het. Mense wat die gawes, maar ook die verrassende belonings van geduld en deursettingsvermoë eerstehands ervaar het.

Christus self was in dié opsig ‘n uitnemende voorbeeld. Op Hom moet en kan ons in hierdie lydenstyd opnuut ons oë rig.

Here leer ons vandag u geduld en deursettingsvermoë, sodat ons nie moedeloos sal word nie. Amen

Carel