Toe hulle by Jesus kom, het hulle ernstig by Hom daarop aangedring en gesê: “Hy is dit werd dat U dit vir hom doen …” (Lukas 7:4).

‘n Mense sou die verhaal van Lukas 7:1-10 wat handel oor die genesing van ‘n Romeinse offisier se slaaf, ook die verhaal van twee getuigskrifte kon noem.

Die eerste getuigskrif kom van ‘n klompie Joodse familiehoofde en handel oor ‘n offisier wat Jesus versoek om sy slaaf gesond te maak. Die Jode was kennelik beïndruk met hierdie heiden-militêr wat in vele opsigte ‘n merkwaardige en ryk filantroop was – iemand wat op eie koste hulle sinagoge gebou en boonop vir sy siek slaaf omgegee het.

Nogal merkwaardig vir ‘n ongelowige! Geen wonder dat hulle hom ernstig by Jesus aanbeveel nie: “Hy is dit werd dat U hom help, dit vir hom doen.”

Maar dan ignoreer die offisier hulle gloeiende getuigskrif, ja, skeur hy dit by wyse van spreek op wanneer hy vir Jesus laat weet: “Here, moenie moeite doen nie, want ek is nie werd dat U onder my dak inkom nie” (Luk 7:6-7).

Hierdie man het geweet dat menslike bewondering of aanprysing dikwels misleidend, veranderlik en oppervlakkig, ja, selfs nutteloos kan wees. Dat ‘n mens jou lewe of waardigheid nooit net daarop kan bou nie. Ook nie op jou baie talente, prestasies of rykdom nie. Nee, wat deurslaggewend is, is wat God van jou sien en dink. Hoe God jou beoordeel. Hierin, so het hy aangevoel, lê ons heil en genesing as mense.

En hy was reg, want kort hierna sou hy nóg ‘n getuigskrif ontvang – dié keer van Jesus. Een wat sy lewe radikaal sou verander. Hierna sal ons môre kyk.

Here, laat ons maar erken hoe strelend en belangrik ander mense se opinies en aanprysing vir ons is. Help ons vandag weer om nie ons lewe of hoop daarop te bou nie, maar alleen op U.

Carel Anthonissen