Op U, Here my God, aan wie ek behoort, is my oë gerig, by U skuil ek, moenie dat my lewe wegkwyn nie (Psalm 141:8).

Iets waaroor almal wonder wat hulle met die praktyk van gebed bemoei, is of daar ‘n bepaalde metode bestaan wat gevolg kan word.

Op dié vraag het die bekende Katolieke geestelike, Thomas Merton, lank gelede ‘n wonderlike antwoord gegee.

“Jy vra my na my manier of metode van bid? Streng gesproke volg ek ‘n baie eenvoudige manier van bid. Dit is om my aandag volkome op die teenwoordigheid van God, op God se wil en op God se liefde te rig. Dit wil sê, my aandag is volledig op daardie geloof gefokus waardeur alleen dit moontlik is om God se teenwoordigheid te ken.”

“Dit gee aan my gebed die karakter van vóór God te wees asof ek God sélf kan sien. Verstaan mooi: Dit beteken nie dat ek ‘n presiese beeld van God vir my kan voorstel nie. In my gedagtes sou dit op ‘n vorm van afgodery neerkom. Die teendeel is eerder waar: Dat ek God vereer en aanbid as onsigbaar en ver bokant ons begrip of verstand, dié God wat alles omvat.”

Ek weet nie hoe jy bid nie, maar miskien kan Merton se eenvoudige manier jou vandag wel help.

Die kern daarvan bly die hardnekkige vertroue dat God dáár is en vandag naby jou wil wees met God se liefde.

Here, soos baie gelowiges voor my, wil ek vandag net naby U kom sit en U aanbid as die onsigbare, getroue God. Sien my in my armoede aan en ontferm U oor my. Amen

Carel Anthonissen