Wees altyd beskeie, vriendelik en geduldig, en verdra mekaar in liefde (Efesiërs 4:2)

Onlangs trek ‘n vriendin van ons uit ‘n meer gegoede buurt na ‘n area van eenvoudiger stand.

Haar waarneming is dat die mense in dié eenvoudiger en armer opset mekaar nodiger het, en daarom méér doelbewus uitreik en selfs vriendeliker is. Ook méér verantwoordelikheid neem om vir mekaar te sorg.

En dit ráák haar, verryk haar lewe op onverwagse maniere.

So vertel sy van die nuwe buurvrou wat kort ná haar aankoms kom aanklop het met die vraag: “Nou, wat doen jy vir ‘n lewe?” Op haar antwoord dat sy onderwys gee, word daar eers lank en indringend na haar gestaar, voordat dié wyse woord uitglip: “Patience, my dear, patience.”

Wat ‘n groot les! Nie net vir dié wat in ‘n nuwe omgewing moet aanpas nie. Maar veral ook vir ons wat vandag in moeilike omstandighede verkeer of in veeleisende situasies moet gaan werk.

Geduld bly inderdaad ‘n kosbare en onvervangbare deug.

Here gee ons vandag weer daardie geduld wat ons kan help om met groeiende liefde teenoor alles en almal te leef. Amen

Carel Anthonissen