Boodskap vir Vandag

Search
Close this search box.
Search

Die geheim van ‘n vrugbare lewe

Wie in My bly en Ek in hom, dra baie vrugte, want sonder My kan julle niks doen nie (Johannes 15:5).

In Johannes 15 herinner Jesus ons nie net aan die belang van ‘n vrugbare lewe nie, maar ook aan die dieper geheim daarvan.

Dit is dat ons lewe in Christus veranker sal wees.

Of soos Jesus dit self stel, dat ons soos lote aan ‘n wingerdstok sal bly in Hom wat die ware wingerdstok is (Joh 15:5). Sonder hierdie onsigbare, mistieke verbintenis aan Christus, is daar van ‘n vrugbare lewe weinig sprake.

Maar presies hoe gebeur dit? Hoe word ‘n mens ‘n loot wat in Christus geplant is?

Die geheim lê, aldus Johannes 15:9-17, daarin dat Christus, net soos met sy eerste dissipels, ons vandag nog uit liefde opsoek, roep en deel van sy vriendekring maak (Joh 15:9-17), van sy kudde, sy liggaam, Homself.

Deur sy Gees verseker Christus ons vandag steeds dat Hy ons ken; dat ons, in die woorde van die Heidelbergse Kategismus, met liggaam en siel aan Hom behoort. En dat Hy ons nooit sal verlaat of sal prysgee nie.

Ja, die Gees maak ‘n woning vir Christus in ons lewe. Die Gees omvorm ons selfs na Christus se beeld. Sodat ons oor tyd al meer soos Hy begin lyk en optree.

En só ‘n vrugbare lewe in en deur Hom begin lei.

Kom Heilige Gees, kom Skepper-Gees, laat Christus in ons lewe gestalte kry sodat ons voor U en ander goed en vrugbaar kan wees. Amen

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.