Toe sê Jesus: “Vader, vergeef hulle, want hulle weet nie wat hulle doen nie!” (Lukas 23:34).

Een van die groot kenmerke van ‘n vrugbare lewe, is die gawe om ander te vergewe.

Meer as eenmaal verwys Jesus na die belang hiervan (Matt 9:1-8, Lukas 23:34). Hy vertel op ‘n stadium selfs ‘n gelykenis om te beklemtoon dat ‘n mens nooit genoeg kan vergewe nie (Matt 18:21-35).

Een van die mooiste voorbeelde van die krag en waarde van vergifnis, kom uit die Tweede Wêreldoorlog. In dié tyd is hierdie aangrypende gebed by die lyk van ‘n jong kind wat onnodig gesterf het gevind. Dit lui só:

“O, Here, onthou nie alleen daardie manne en vroue met goeie bedoelings nie, maar ook hulle met kwade bedoelings. Moenie al die lyding wat hulle oor ons gebring het, onthou nie. Onthou eerder die vrug wat óns deel geword het dánksy hierdie lyding – ons kameraadskap, ons lojaliteit, ons nederigheid, ons moed, ons gasvryheid, ja, die grootheid van hart wat uit dit alles gebore is. En wanneer hulle, die kwaadwilliges, dan eendag onder u oordeel kom, laat al hierdie vrugte wat óns voortgebring het, húlle vergifnis ook wees.”

Jy moet saamstem: Dit is ‘n aangrypende, maar ook ‘n beskamende getuienis. Een wat volledig in die gees van Christus se woorde aan die kruis is.

O, Here, maak ons harte vandag weer so groot dat ons ook ons bitterste vyand kan vergewe. Amen

Carel Anthonissen