Wees op julle hoede, wees waaksaam, omdat julle nie weet wanneer die tyd daar is nie (Markus 13:33).
‘n Paar jaar gelede, tydens ‘n besoek aan die Noorde, bemerk ek oor die loop van ‘n paar dae dat ek meer lighoofdig, selfs moeër, as gewoonlik voel.
My geluk op daardie stadium was dat ek by ‘n vriend wat ‘n mediese dokter is oorbly. Tot vandag toe is hy ‘n deeglike arts wat nie onnodige kanse waag nie. Hy neem sy pasiënte se klagtes ernstig.
Die gevolg was dat ek oornag vir allerlei toetse in die hospitaal beland. Uiteraard was ek ietwat ongemaklik en selfbewus hieroor. ‘n Mens wil nie graag van onnodige ipekonders of paranoia beskuldig word nie. Maar my vriend was onversetlik.
Gelukkig was al die toetse negatief en moes ek aanvaar dat dit waarskynlik net die hoëveldse lugdruk was wat my aangetas het. Dit het my nog méér selfbewus gelaat: Al die moeite en onkoste, en dit vir niks nie!
Totdat my vriend my met ‘n lewenswaarheid getroos het wat beslis wyer van toepassing is: “Man, liewer paranoia nou as permanente chaos en depressie later.”
Beslis iets om oor na te dink, ook as gelowige, nie waar nie? Veral in ‘n land waar die alarms nou ‘n geruime tyd al loei en ons geroep word tot ‘n vorm van voorsorg en waaksaamheid wat latere chaos en depressie kan verhoed.
Here, gee ons vandag daardie waaksaamheid wat nie oorangstig raak nie, maar wakker en ontsteld genoeg is om die nodige voorsorg en optrede te verseker. Amen
Carel Anthonissen
