Kom terug na die Here julle God toe: Hy is genadig en barmhartig; Hy is lankmoedig en vol liefde (Joël 2:13).

Dit is tog interessant hoe elke slag wanneer rampe toeslaan, hetsy via siekte of verlies, plae of epidemies, die praatjies en vrae oor God weer opvlam.

Vir sommige is sulke omstandighede ‘n bewys dat God afwesig, dood en selfs volledig irrelevant is.

Ander wat wel God se bestaan aanvaar, wonder weer oor die aard van God se planne. Is God nie maar onvoorspelbaar, wispelturig en selfs toornig is nie – ‘n God wat eerder straf as vergewe?

Van oudsher was dit die taak van die profete om hierdie Godsgeheim op te klaar. Om ons van God se rol in ons lewe, die geskiedenis en die natuur bewus te hou. Ons ook daaraan te herinner dat daar nie ‘n dag is wat God nie met ons besig is nie. Ja, dat selfs in ons diepste ellendes hierdie God steeds daar is om te werk, te waak en te sorg.

Ten minste was dit waarvan die profeet Joël ,400 jaar voor Christus, sy volk bewus wou maak en wou oortuig. In dié tyd tref ‘n erge springkaanplaag die land. Wat ná die vreters se aanslag oorbly, is ‘n verwoeste land en ‘n volk sonder geloof, hoop of vreugde.

Te midde van hierdie ellende, maan die profeet: “Kom terug na die Here julle God toe. Skeur julle harte. Vas, huil en treur. Roep na God. Ontdek opnuut dat God daar is: naby, reddend, voorsienend. Want God is genadig en barmhartig, ‘n God van medelye. ‘n God wat sy volk nie in skande wil laat kom nie” (Joël 2:12-13).

Ek ken nie jou omstandighede nie, maar miskien is dit ‘n boodskap wat jy vandag weer moet hoor. En waarop jy moet leer vertrou.

Here, ons twyfel baie dae aan U. Maar dankie vir Joël wat ons vandag weer daaraan herinner dat U bestaan en dat U genadig en barmhartig is. Amen

Carel Anthonissen