ʼn Wyse mens praat verstandig en kies sy woorde so dat hy ander kan leer (Spreuke 16:23).
Daar was ʼn tyd toe byna elke NG predikant wat ek geken het die boeke van die bekende Nederlandse geestelike Henri Nouwen gelees het.
En daar was goeie redes hiervoor.
Eerstens was Nouwen ʼn gerespekteerde teoloog en Bybelkenner met die ongewone vermoë om sy insigte in helder, vars en verstaanbare taal oor te dra. Dit was altyd lekker om ʼn boek van Nouwen op te tel en te lees.
Daar was egter ook ʼn ander rede vir sy gewildheid, vir die groot appèl wat sy werk op mense gehad het. Dit was dat die waarhede wat hy so vrylik gedeel het volkome deurleef en eg was. Dit was meestal die neerslag van sy eie en dikwels intense omgang en worsteling met mense en die probleme en uitdagings van sy tyd.
Wie ʼn boek van Nouwen gelees het, is gewoonlik diep daardeur geraak. Asof die leser ontdek het: Hy weet presiés waarmee ek worstel en waarna ek verlang. Hy ken dit self.
Wat ons weer herinner dat egte selfkennis die sleutel tot alle ware ontmoetings is. En hoe waardeloos en selfs goedkoop godsdienstige slagspreuke of waarhede kan wees as dit nie vanuit die hart kom nie.
O Here, help ons vandag om meer eg te leef en eerliker te praat. Amen.
Carel Anthonissen
