Boodskap vir Vandag

Search
Close this search box.
Search

Draers van lig in ʼn siellose wêreld

Vroeër was julle die ene duisternis, maar nou in die Here is julle lig. Leef dan as mense van die lig (Efesiërs 5:8).

Aanvullend by Augustinus se gebed dat God ons daarvan sal bewaar dat ons donker stemme ons sal aandag in beslag sal neem en ons sal oorweldig, is daar Jesus se positiewe vermaning in Johannes 12:35.

Daar lees ons: “Lewe in die lig terwyl julle dit het sodat die duisternis julle nie oorval nie.”

Vir eers beteken dit dat ons vandag opnuut ons aandag en ons gedagtes sal draai na Hom oor wie die Bybel vertel dat Hy die lig en die hoop van die wêreld is – die Een wat die kwaad oorwin en die donkerte verdryf het.

Hóm wat deur sy Gees in ons leef, moet ons toelaat om ons aandag te boei, ons gedagtes en denke in beslag te neem. Ja, in sý lig – dit is die boodskap van sy daaglikse vergifnis en onophoudelike liefde – moet ons elke oomblik gaan wandel.

Wie dít waag, begin algaande weet waartoe hulle in dié lewe geroep en bestem is. Boonop kom daar ʼn ligtheid en ʼn gelatenheid, selfs ʼn diep vreugde en ontspanne gevoel in hulle lewe. Hulle kommer vervaag. Hulle depressie begin wyk. Hulle maak hulle nie meer moeg met die donker en neerdrukkende dinge van die lewe nie.

Want hulle groot soeke en belangstelling is nou hoe om egte mense van die lig te wees. Ja, draers van lig in ʼn donker en siellose wêreld.

Here, lig van ons lewe, na U draai ons vandag opnuut. Ons bid: Vul ons met die lig van u liefde en u vergifnis. Leer ons wat dit beteken om draers van dié lig te wees. Amen.

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.