Boodskap vir Vandag

Search
Close this search box.
Search

Om te dans na die lig

Vra julle voortdurend af of iets vir die Here aanneemlik is (Efesiërs 5:10).

Wees altyd bly in die Here! Ek herhaal: Wees bly! (Filippense 4:4).

Dit bly die groot uitdaging van Advent: hoe om as volgelinge van Christus, te midde van soveel dwaasheid en donkerte rondom ons, te leef in die lig wat Hy gebring het.

In Efesiërs 5, asook in Filippense 2 – 4, gee Paulus enkele riglyne hieroor.

Om mee te begin – só impliseer hy in Efesiërs 5:8-9 – beteken dit gewoon ons sal elke dag doen wat goed, reg en waar is. Kortom, ons sal mense met integriteit wees, met ander woorde, eerlike mense met ʼn skerp sin vir wat goed en reg is.

Om só te leef is egter nie altyd maklik nie. Dit vra, volgens Paulus, ʼn bepaalde dissipline. Dit is om elke dag in stilte voor God te buig en te vra of dit waarmee ons besig is wel vir God aanneemlik is. En só, deur daaglikse stilword en gebed, groei ons vermoë om te onderskei tussen wat vrugteloos is en wat die moeite werd is.

Ons word in die ware sin van die woord verstandig. Sodat ons nie net begin wegdraai van alles wat leeg en vrugteloos is nie; ons kry ook die moed om dié dinge as vals en skadelik te ontmasker.

Meer nog, wie toelaat dat die lig van God se helende liefde in hulle lewe inskyn, ervaar, volgens Paulus in Filippense 4, ʼn nuwe vryheid en vreugde. Hulle begin letterlik, soos een skrywer dit gestel het, na die lig toe dans.

En wie dans – dit weet ons tog – kan nouliks negatief en donker na die lewe kyk.

O Here, help ons vandag om weer te dans na u lig. Amen.

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.