Boodskap vir Vandag

Search
Close this search box.
Search

Jy hoort nie hier nie!

Gee aandag en kom na My toe, luister, en julle sal lewe (Jesaja 55:3).

Party mense kom verskriklike dinge oor – soos vriende van ons wie se dogter as gevolg van ʼn dwelmprobleem weggeloop en byna vyf jaar uit hulle lewe verdwyn het.

In dié tyd het hulle geen taal of tyding van haar ontvang nie. Uiteindelik moes hulle die pynlike en bykans onhoudbare waarheid aanvaar dat hulle haar vir altyd verloor het.

Totdat hulle dogter hulle eendag, byna soos die verlore seun, uit die bloute gekontak en na haar ouerhuis teruggekeer het. Vandag, ná ʼn lang pad van herstel, staan sy weer op haar voete. Sy is gelukkig getroud, het kinders en kyk met dankbaarheid terug op ʼn veelbewoë maar wonderlike pad.

Vra jy haar uit oor die keerpunt in haar lewe, vertel sy ʼn merkwaardige verhaal. Van die ouerige man wat haar op ʼn dag in Londen op straat gesien en vir haar gesê het: “My kind, ek kan sien jy sukkel, maar dat jy uit ʼn goeie huis kom. Bel jou ouers vandag nog. Praat met hulle. Jy is baie meer werd as wat jy dink. Jy hoort nie hier nie.”

Waarom aan die begin van die jaar hierdie verhaal vertel? Omdat ook jy miskien vandag op ʼn plek is van waar jy moet terugdraai.

Want jy hoort nie daar nie!

Here, vandag draai ek opnuut na U toe met die vertroue dat ek in u oë kosbaar is en dat U my nooit sal verwerp nie. Dankie daarvoor. Amen.

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.