Geliefdes, as ons gewete ons veroordeel – God is groter as ons gewete, en Hy weet alles (1 Johannes 3:20).

In haar mooi boek oor Daniel Stein, die merkwaardige Jood wat later ʼn Christen geword het, vertel die Russiese skrywer Ludmila Ulitskaya ook van sy worsteling.

Daar was veral een nare herinnering uit die oorlogsjare wat sy gewete dikwels gepla en belas het.

Dit was toe Daniel, in sy poging om 20 inwoners van ʼn Poolse dorpie te red, aandadig geword het aan die teregstelling van die sogenaamde dorpsidioot. Dié man was totaal onskuldig, maar moes boet vir ander se verraad. “To this day,” só bely Daniel later teenoor ʼn groep skoolkinders, “that memory is a heavy burden on my heart. It is a terrible memory.”

Oor die jare sou Daniel wel leer om dié slegte herinnering te bedwing en selfs by tye af te skud. Allereers deur sy gedagtes op positiewe herinneringe te rig. Soos toe hy vir die eerste maal verlief geraak het. “There was such a powerful sense of joy at the beauty of a woman, a woman’s charm.”

Maar dit was veral die belofte van God se genade en vergifnis wat elke dag op ons wag waarop hy telkens teruggeval het. In sy woorde: “When a person takes one step towards God, God immediately takes two towards them.”

Miskien sukkel jy vandag met allerlei verwyte en slegte herinneringe. Beproef gerus Daniel Stein se raad of weg.

Here, dankie dat U die nagmerries in my lewe ken en verstaan. Dankie veral vir die belofte van u groot liefde en blywende vergifnis waaruit ek vandag weer kan gaan leef. Amen.

Carel Anthonissen