Skep vir my ʼn rein hart, o God, vernuwe my gees en maak my standvastig (Psalm 51:12).

Ek het die afgelope vakansie tyd ingeruim om Sylvie Simmons se omvattende en hoogs interessante biografie oor die digter en sanger Leonard Cohen te lees.

Behalwe dat Cohen ʼn baie begaafde musikant en digter was, het hy sy lewe lank ook die geestelike dimensie van ons lewe ernstig geneem. Hoewel hy as Jood gebore en getoë is, het hy vir inspirasie en koers in sy lewe ook uit ander godsdienstige tradisies geput.

Sy bekende liedjie “Suzanne” staaf onder meer sy respek vir die Persoon Jesus.

Hierdie geestelike dimensie van Cohen se lewe het veral in sy later jare sterker na vore gekom. In dié tyd herinner hy sy tydgenote daaraan dat ons almal “creatures of a higher order” is. En dat gebed die enigste weg is waarlangs ons ons gebroke verhouding met die Bron van alle dinge kan herstel.

As deel van ʼn laaste album, Book of Mercy, skryf hy selfs ʼn aangrypende gebed, oftewel ʼn roerende appèl tot die Bron van genade, soos hy dit noem. Dit lui soos volg:

“In utter defeat I came to you and you received me with a sweetness I had not dared to remember. Tonight I come to you again, soiled by strategies and trapped in the loneliness of my tiny domain. Establish your law in this walled place.”

Miskien is dit ook jóú versugting vandag. En dalk gee Cohen vir jou woorde om te bid.

Here, dankie vandag vir kunstenaars wat in hulle soektog na U ook vir ons help om eerlik tot U te nader. Amen.

Carel Anthonissen