Boodskap vir Vandag

Search
Close this search box.
Search

Doen jy net jou werk!

Maar laat die reg en die geregtigheid na vore kom, laat dit aanrol soos watergolwe, soos ʼn standhoudende stroom (Amos 5:24).

Suna is ʼn klein, skraal vrou, maar sy het die spreekwoordelike hart van ʼn leeu.

Sy sê self daar is altyd kwessies waarmee sy haar bemoei. As dit nie die beskerming van diere of plante is nie, is dit misdaad of korrupsie.

Onlangs word sy, nadat sy per ongeluk die spoedgrens oorskry het, deur ʼn verkeersbeampte van die pad af getrek. Die boete is hoog en die beampte sien daarin ʼn kans om ietsie vir homself te maak. Aanvanklik verstaan Suna nie wat hy bedoel nie toe hy nonchalant voorstel: “Laat ons praat, miskien kan ek jou help.”

Die beampte het dié vroutjie egter onderskat, want toe sy eers die bedoeling agter sy woorde snap, het haar drif geen perke geken nie. Verontwaardig het sy hom aangevat: “Skaam jy jou nie, Meneer, dat jy my probeer afpers nie? Ek het oortree en ek sal betaal. Doen jy net jou werk. Skryf die boete. Dit is waarvoor jy aangestel is en waarvoor jy betaal word.”

Volgens Suna het die verkeersbeampte haar ʼn oomblik sprakeloos aangekyk, en toe in sy motor geklim en weggery.

Nie al hierdie soort insidente eindig só nie. Daar is mense wat dié soort kanse aangryp en hulle laat omkoop. Party verkeersbeamptes laat hulle ook nie sommer van stryk bring nie. Hulle misbruik hulle mag en raak dreigend. Albei optredes is skandalig en hoort nie by beskaafde mense nie. Wat nog te sê by hulle wat bely dat hulle Christus volg!

Ons het meer mense soos Suna in ons samelewing nodig.

Here, U roep ons om vandag mense te wees wat geregtigheid soek en u reg soos watergolwe laat aanrol. Help ons om hierin moedig en dapper te bly. Amen.

Carel Anthonissen

Inspirasievennoot

Boodskap vir Vandag is ’n reeks inspirerende elektroniese dagstukkies wat daagliks duisende lesers bereik. Ons doel is om Christene te bemoedig, uit te daag, te ondersteun en te inspireer.

Indien jy nie die daaglikse e-pos ontvang nie, maak asseblief seker dat jou SPAM-filters dit nie verwyder nie.
Jy besoek nou LiG, ons susters-publikasie se webtuiste, propvol inspirerende getuienisse. LiG-getuig: Waar elke getuienis tel. By LiG is ons toegewyd om inspirerende stories te deel wat die hart aanraak en hoop bied. Jy besoek nou ons susters-organisasie se webtuiste, propvol inspirerende getuienisse.

Daaglikse Inspirasie

Die Boodskap vir Vandag-app is nou beskikbaar vir jou selfoon.
Installeer dit vandag nog.